• أحدث المقالات

    السبت، 28 يناير، 2017

    ذاكر صح : كورس كامل مجانى يعلمك إزاى تذاكر صح

    ذاكر صح : كورس كامل مجانى يعلمك إزاى تذاكر صح

    كيف تنظم يومك لكى تذاكر بشكل صحيح ؟

    كيف تنظم يومك لكى تذاكر بشكل صحيح ؟

    أول حاجة لازم تكون صح قبل طريقة مذاكرتك هو يومك اللى بتذاكر فيه ؛ يعنى لازم تبقى عارف إن اليوم 24 ساعة بس وإنك لو نظمتهم صح هتقدر تعمل حاجات كتير غير المذاكرة وكمان تذاكر بتنظيم أكتر .

    أهم حاجة فى اليوم هى النوم طبعاً

    :D

     المفروض النوم 8 ساعات من الـ 24 ساعة 
    -_-

     كدة باقى 16 ساعة تعمل فيهم كل الحاجات الباقية ؛ دروسك ومدرستك بتكون 5 ساعات أو على حسب مواعيدك إنت بتنظمها ، كدة باقى معانا 11 ساعة !!

    هيجى حد دحيح يقول نذاكر فيهم بقى 
    B|



    أقوله لأ طبعاً فى حاجات تانية كتير مهمة لازم تكون فى يومك إلى جانب الدراسة علشان المذاكرة نفسها تكون صح زى عباداتك زى الصلاة مثلاً وزى الرياضة اللى لازم يكون ليها وقت فى يومك علشان تحافظ على صحتك وزى وقت الأكل 
    :v

     كل دة ممكن يآخد منك 3 ساعات كمان .

    كدة يبقى باقى كام ساعة فى اليوم ؟؟

    بالظبط كدة 8 ساعات ، هنام تانى بقى ولا أيه ؟ أكيد لأ مصحيناش علشان ننام 
    :P



    الـ 8 ساعات دول ممكن نذاكر منهم 4 ساعات أو نخليهم 6 بما إننا قربنا على الإمتحانات بس حتى لو كنت هتذاكر ساعتين فى اليوم ممكن يكونوا أحسن من 10 ودة هنعرفه بعد شوية 
    :D

     أقصد إننا هنتكلم عن طرق المذاكرة 
    ;)



    كدة إنت عملت كل حاجة فى يومك نمت وصحيت وحضرت دروسك وذاكرت وأكلت وصليت ولعبت رياضة ولسه باقيلك ساعتين ممكن تخرج فيهم مع صحابك أو تفتح الفيس بوك ( ودة لازم يكون فى نهاية اليوم أو فى وقت بعيد عن وقت المذاكرة علشان متشتتش تركيزك ) ممكن كمان تمارس هوايتك أو تطور موهبتك اللى بتحبها واللى غالباً بتهملها فى الثانوية وبتطلع من الثانوية العامة من غيرها 
    :/

     ودول أهم ساعتين فى اليوم متسمعش للى بيقولك  دول تضييع وقت لأن دول بيدوك الحماس والطاقة إنك تكمل وتواصل يومك ومذاكرتك 
    ^_^



    ومتنساش حياتك الإجتماعية لازم يكون فى وقت تقعد فيه مع أهلك وتتكلم معاهم وتحكيلهم عن تفاصيل يومك ودراستك وبلاش كلام فى السياسة علشان إحنا مظبطين اليوم على 24 ساعة بس 


    لو يومك مشى بالشكل دة هتكون قدرت تنظمه صح وتستفيد من كل ساعة فيه ووقت المذاكرة كمان يكون صح وفعال .


    ماذا أفعل قبل المذاكرة لكى استعد للدراسة بشكل صحيح ؟


    ماذا أفعل قبل المذاكرة لكى استعد للدراسة بشكل صحيح ؟
    إتكلمنا عن تنظيم الوقت وعرفنا إزاى نقدر نعمل حاجات كتير (من ضمنها المذاكرة طبعاً   :P ) فى الـ 24 ساعة اللى عندنا فى اليوم    ;)



    دلوقتى هنتكلم عن جزء مهم جداً فى المذاكرة وهو مرحلة ما قبل المذاكرة.

    علشان مذاكرتك تكون صح لازم تستعد ليها بطريقة صح وتتأهل نفسياً لكدة علشان تقدر تركز.

    أول وأهم حاجة إنك تختار مكان مناسب للمذاكرة ويكون بعيد عن كل مصادر التشتت وتبدأ ترتب المكان كويس وتخلى قدامك ورق وكتب المادة اللى هتذاكرها بس يعنى بلاش زحمة قدامك ، زى ما هترتب مكتبك رتب كمان دماغك وأفكارك وإستعد نفسياً وإنسى أى حاجة ممكن تشغلك عن المذاكرة وتآخد أى جزء من تفكيرك ، خلى دايماً معاك أقلام ملونة كتير يمكن تحب تسلى وقتك وإنت بتذاكر فتلاقى حاجة ترسم بيها ، وبلاش يكون من طقوس إستعدادك للمذاكرة شرب المنبهات علشان متتعودش عليها !!

    بعد ما تعمل كل دة وإنت مقرر هتذاكر مادة أيه إبدأ حدد الأفكار الرئيسية للدرس اللى هتذاكره وقرر إنك تفهم قبل ما تحفظ علشان المعلمومات تثبت .

    إستعديت كويس ؟؟

    يلا بقا نتعرف أكتر على طرق المذاكرة نفسها ..

    طرق المذاكرة علشان تذاكر صح :


    طرق المذاكرة علشان تذاكر صح


    ذاكر كتير فى وقت قليل


    وصلنا للذتونه بتاعة كورس ازاى تذاكر صح

    لمّا إتكلمنا عن تنظيم الوقت قُلنا إن أسلوب مذاكرتك الصح هيوفر عليك وقت كتير وبدل ما تذاكر 8 أو 10 ساعات فى اليوم ممكن تذاكر نص الوقت دة ومذاكرتك تكون فعّالة أكتر .

    إزاي بقي O.o ؟!

    أقولك أنا ;)

    1- سمعت قبل كدة عن حاجه اسمها Mind Mapping أو الخرائط الذهنية ؟؟


     دى طريقة بنلخص بيها موضوع كبير جداً وفيه معلومات كتير فى مساحة صغيرة وبشكل مبسط فى صورة رسمة أو خريطة على هيئة أشكال هندسية دواير ومستطيلات بتكتب عنوان الموضوع وتقسمه للعناصر اللى فيه وتحت كل عنصر بتكتب معلومة تفكرك بالتفاصيل أو حتى ترسم رسمه صغيرة زى الصورة اللى فوق دى .


    2- فى طريقة تانى إسمها كورنيل :


    تعالوا نشرح الطريقة بغض النظر عن إسمها :D تجيب ورقة فاضية أكيد :P وتقسمها بالشكل ده زى الصورة اللى فوق ناحية الشمال هنكتب "Keywords" أو النقاط الرئيسية فى الموضوع ، وقدام كل نقطة على اليمين هنكتب شرح كل نقطة منهم على حسب فهمنا ، وتحت على الشمال هنكتب ملخص "Summary" الموضوع كله بيتكلم عن أيه ، وتحت خالص على اليمين ملاحظات "Notes" والجمل اللى بتكون بين السطور دى وأى قوانين مهمة وغالباً الإمتحان كله بيكون فى الربع الأخير دة :D وفى الآخر هيكون معاك الدرس كله فى صورة نقاط  رئيسية بكل الفهم والتلخيص والملاحظات فى ورقة واحدة تقدر ترجعلها فى أى وقت وتراجع منها الدرس بسرعة .

    3- جدول المذاكرة


    جدول المذاكرة حاجة مهمة بس مش إلزام عليك :D مين بيعمل جدول  مذاكرة ويلتزم بيه ؟؟ طيب مين بيعمل ومش بيلتزم ؟؟ مش هنسأل بقى مين مبيعملش خالص علشان الإحراج :P

    الفكرة هنا إن كل واحد ليه الحاجة اللي بتلزمه إنه يخلص اللى وراه الجدول ممكن يكون طريقة من ضمن الطرق وممكن يكون جدول شامل للأسبوع كله أو يوم بيوم يعنى أول كل يوم تقول إنت عندك أيه مهم النهاردة وتكتبه قدامك أو حتى تخليه فى دماغك وكل ما تخلص حاجة تعمل عليها ( تم ) Done .

    من الحاجات المهمة جداً اللى لازم نكون عارفينها علشان طريقة مذاكرتنا تكون صح هى الـ Memory Type أو نوع ذاكرتك !!

    يعنى لو سألنا كل واحد تفتكر أيه أحسن طريقة للمذاكرة ؟؟

    إنك تقرأ بس بعينيك ؟؟

    ولا إنك تقرأ بصوت عالى ؟؟

    ولا لازم تمسك ورقة وقلم وتكتب ؟؟

    ولا بتحب تسمع الدرس متسجل تانى ؟؟

    هنلاقى الإجابات مختلفة والإختلاف هنا بيكون على حسب نوع ذاكرة كل واحد ؛ يعنى فى ناس ذاكرتهم سمعية فالأحسن إنهم يسمعوا ريكورد الحصص تانى وهما بيذاكروا و يقرأوا بصوت عالى ، فى ناس تانى عندها ذاكرة بصرية فأكيد الأحسن إنهم يقرأوا الكلام بعنيهم بتركيز ويلونوا ويحفظوا بمكان الكلام فى الصفحة وممكن يكتبوا كمان أو يرسموا رسومات تخطيطية علشان يصوروها بعنيهم ويقدروا يخزنوها بشكل كويس ويسترجعوها بسهولة فبلاش تسمع لكلام حد يحاول يقنعك إن طريقتك غلط وإنك لازم مثلاً تكتب علشان تثبت المعلومة فلو مقتنع إن طريقتك صح وبتعرف تحصِّل بيها كويس كمّل زى ما إنت ماشى ومتشتتش نفسك.

    بعدما تخلص مذاكرتك وتعمل تلخيصاتك كلها راجع كل اللى ذاكرته بسرعة ( قراية جرايد ) وإعمل ربط بسيط كدة فى دماغك علشان تثبت المعلومات ^_^

    ثم إفصل بقى بين مذاكرة مادة ومادة ، دة هنعرفة دلوقتى :) إزاى تذاكر المواد مع بعض وتفصل بينهم بأيه ;)

    ازاى تذاكر بطرق ذكية جدا وتستفاد من وقتك وتذاكر صح ؟


    ازاى تذاكر بطرق ذكية جدا وتستفاد من وقتك وتذاكر صح ؟

    كنا إتكلمنا من شوية عن طرق المذاكرة وإزاى ممكن تذاكر أجزاء كتير فى وقت قليل ،
    وكانت تانى طريقة إتكلما عنها هى طريقة " كورنيل " وشرحنا فكرتها بإختصار ونظراً لأهميتها هنحاول نتكلم عنها بتفصيل أكتر دلوقتى ، يلا بينا ;)


    1- تجيب ورقة "فاضية أكيد" :P


    2- هتقسم الورقة بالشكل اللى فى الصورة دة لـ أربع مربعات.


    3- أول مربع على الشمال إسمه الـ "Keywords" و ده بنكتب فيه النقاط الرئيسية فى الدرس.


    4- المربع التانى اللي هو فوق على اليمين إسمه مربع الـ "Discussion" وده بنكتب فيه قصاد كل نقطة من النقط اللى كتبناها على الشمال فى المربع الأولانى شرح كل نقطة منهم بإختصار على حسب فهمنا.


    5- تحت على الشمال هنكتب ملخص "Summary" للشرح اللى إنت كتبته كله والموضوع كان بيتكلم عن أيه بحيث تغطى كل اللى ذاكرته وإستفدته من الدرس وأهم المعلومات اللى قابلتنا فى ملخص بسيط تقدر ترجعله فى أى وقت تفتكر منه تفاصيل الموضوع بسهوله.


    6- تحت خالص على اليمين هنكتب أهم الملاحظات "Notes" والجُمل الصغيرة اللى بتكون بين السطور دى وأى قوانين مهمة أو إحصائيات ، نسب مئوية ، رسومات توضيحية ، معادلة مهمة أو حتى تواريخ مش بنآخد بالنا منها ، وغالباً أسئلة الإمتحان بتكون معظمها من الجزء دة ;)


    كدة فى النهاية هيكون معاك الدرس كله فى صورة نقاط رئيسية بكل الفهم والتلخيص والملاحظات فى ورقة واحدة تقدر ترجعلها فى أى وقت وتراجع منها الدرس بسرعة ومش هتآخد منك وقت كتير علشان تعملها إنت بس بتفهم الموضوع كله وتلخصه بأسلوبك والطريقة دى ممكن نطبقها مع كل المواد العلمية والأدبية وحتى اللغات والرياضة حسب معلومات كل مادة ;)


    كدة خلصنا شرح الطريقة وإزاى نطبقها بس فى سؤال مهم جداً محدش سأله :D مين أصلاً كورنيل دة O.o ؟


    دة كان دكتور إسمه ( Walter Pauk ) لأ لأ مسموش كورنيل :P مدير مركز "كورنيل" للدراسات ومن الأساتذة الكبار في مجال مهارات التعليم كان بيدور على حل يسهل على طلبة جامعة كورنيل الأمريكية التدوين والتلخيص أثناء المحاضرات ووصل للطريقة دى واللى بتطبق من سنة 1950 وحققت نتائج مبهرة :)


    ملحوظة : طريقة كورنيل الأساسية بتقسم الورقة 3 وبيعتبر الشرح "Discussion" والملحوظات "Notes" حاجة واحدة كبيرة بتكتب فيها كل التفاصيل ، إحنا بس هنا فصلنا الـ Notes لوحدها علشان مبدأ أسئلة الإمتحان :)

    طريقة المذاكرة عن طريق الخرائط الذهنيه :

    طريقة المذاكرة عن طريق الخرائط الذهنيه

    إتكلمنا فى الجزء اللى فات عن أول طريقة من طرق المذاكرة بالتفصيل وعرفنا إزاى نقدر نطبقها بسهوله . أما دلوقتى هنتكلم عن تانى طريقة وهى طريقة "الخرائط الذهنية" أو الـ Mind Map ;)

    فى الطريقة دى بنلخص موضوع كبير جداً وفيه معلومات كتير فى مساحة صغيرة فى ورقة واحدة بشكل بسيط فى صورة رسمة أو خريطة ( عشان كدة إسمها Mind Map :D ) وبتكون الورقة متقسمة على هيئة أشكال هندسية دواير ومستطيلات ( زى الصورة اللى فوق دى ) بتكتب فى مربع كبير فى أول الصفحة أو فى النص عنوان الموضوع وتنزل منه كذا سهم لمربعات أصغر تكتب فيها النقاط الرئيسية يعنى بتقسم الموضع للعناصر اللى فيه وتحت كل نقطة من دول بتكتب معلومة عنها تفكرك بالتفاصيل أو جملة بسيطة أو حتى ترسم رسمه صغيرة مش لازم كلام كتير علشان الهدف الأساسى من الطريقة إننا نختصر الدرس كله فى ورقة واحدة نقدر نرجعلها فى أى وقت نفتكر كل تفاصيل الموضوع بسرعة ، ونخلى بالنا إن فى نقاط ممكن يطلع منها أسهم تانى اللى بيبقى تحتها تفاصيل وعناصر كتير علشان كدة بنقول مربعات ودواير.

    ماذا أفعل أثناء المذاكرة لكى أذاكر بشكل مفيد وصحيح ؟

    ماذا أفعل أثناء المذاكرة لكى أذاكر بشكل مفيد وصحيح ؟
    :D
    ^_^
    دلوقتى هنتكلم عن جزء مهم جداً من محتوى كورس #ذاكر_صح وفيه إجابة على أكتر أسئلة بنسألها دايماً عن أذاكر إمتى فى اليوم ؟ أذاكر  4 ساعات ورا بعض ولا منفصلين ؟ أذاكر مادة واحدة فى اليوم ولا مادتين ؟ طيب ترتيب المواد الأفضل يكون إزاى ؟ كتير من الأسئلة اللى بتقول إنك قررت تذاكر بس محتار تبدأ منين فعلشان الحيرة متوصلش إنها تخليك متذاكرش هنجاوب على كل الأسئلة دلوقتى :D

    1- أول حاجة هتعملها بعد ما تقرر المادة اللى هتذاكرها هى إنك تعدى بسرعة على الدرس فى 5 دقايق تفهم هو بيتكلم عن أيه من غير تركيز وبعدين تبدأ تحدد الأفكار الرئيسية للموضوع وبعدها تدخل فى التفاصيل حسب طريقة مذاكرتك .

    2- لازم تفهم كويس قوى قبل ما تحفظ لأن الجزئيات اللى هتحفظها من غير ما تكون فاهمها كويس أو مربطها بحاجة معينة فى دماغك أو ملخصها فى شكل بسيط حتى لو قصة هتتنسى وهيبقى صعب تسترجعها .

    3- بلاش تذاكر مادتين شبه بعض ورا بعض على طول علشان كدة ممكن المعلومات تتداخل فى بعض ومتعرفش إنت كنت بتذاكر إنجليزى ولا فرنساوى فتحط فى نهاية كل الكلمات :)

    4- الأفضل إنك تذاكر 50 دقيقة وتآخد ريست ( راحة ) فى مكانك 10 دقايق ( فى مكانك ها مش على الفيس بوك :P ) وترجع تكمل 50 دقيقة وتآخد ريست تانى وممكن بعد ساعتين تآخد ريست طويل نص ساعة وترجع تكمل

    5- بعد ما تخلص مذاكرة الدرس كاملاً إرجع بص على كل اللى قريته بسرعة جداً بعينيك من غير تركيز وإعمل ملخص فى دماغك لكل الموضوع ولو كاتب ملخص بطريقة معينة إقرأه تانى قبل ما تقول أنا خلصت وحاول تفتكر العناوين الرئيسية من غير ما تبص وياريت لو تحل أسئلة على الجزئية اللى ذاكرتها لأن دى أكتر حاجة بتثبت المعلومات .

    6- حاول تفصل بين كل مادة ومادة دة لو كنت بتذاكر أكتر من مادة فى اليوم الواحد.

    7- فى ناس بتحب تذاكر كل يوم مادة واحدة علشان متتشتتش وناس تانية بتزهق ومش بتقدر تعمل كدة فبتذاكر أكتر من مادة فى اليوم فهنا مفيش قاعدة ثابتة أو أفضل على حسب أكتر أسلوب جربته وبيريحك :) اختار براحتك المهم تذاكر .

    8- ترتيب المذاكرة كمواد مش ثابت وملهوش قاعدة برضو يعنى ممكن تبدأ بأكتر مادة بتحبها علشان تحمس نفسك وتكمل أو تبدأ بأكتر حاجة مش بتحبها أو حاسس إنها صعبة علشان تخلص منها الأول بعدين تكمل فى اللى بتحبه فده حسب طريقة كل واحد ، ممكن كمان تبدأ بالأجزاء البسيطة عشان تكسب وقت وتحس إنك بتنجز ، وممكن تراعى فى جدول يوم تذاكر جزء كبير وصعب مع جزء بسيط علشان تعمل توازن فى الأيام

    حاول متقفش كتير عند الأسئلة دى أو التفكير فى أيه أحسن طريقة للمذاكرة وتشتت نفسك بين كل نصيحة بتسمعها من اللى حواليك وتأكد إن أفضل طريقة للمذاكرة بالنسبالك هى اللى إنت جربتها ومتعود عليها وبتعرف تأديها كويس وصح وبكده تقدر تذاكر صح.

    نصائح أخيره لكى تذاكر بشكل صحيح وتنجز :


    نصائح أخيره لكى تذاكر بشكل صحيح وتنجز

    كلامنا دلوقتى هيكون بعيد شوية عن طرق المذاكرة والجداول والـ Mind Maps والأمور دى كلها :D هنتكلم عن الحالة النفسية لطلبة الثانوية العامة فى فترة الإمتحانات :)

    مقدمات كتير قوى وكلام عميق O.o ندخل فى الموضوع على طول ونآخد دايرة دايرة من اللى فى الصورة دول ونتكلم عنها

    1- متستسلمش : فى ناس كتير بتذاكر من أول السنة وبتيجى فى الوقت دة ( وقت الامتحانات )  تزهق وتحس إنها مش قادرة تكمل وللأسف بيضيعوا مجهود السنة كلها على الفاضى فى مقابل إنه لو ركز كمان أقل من شهر وكمل على نفس المستوى هيوصل لهدفه ويحقق كل اللى بيتعب علشان يوصله من الثانوية ،  يبقى ليه نستسلم ;) ?

    2- متكتئبش : الناس اللى بتحب تكتئب فى الأيام دى ويبدأوا يفكروا بطريقة سلبية جداً ومش هنوصل لحاجة والإمتحانات هتيجى صعبة والتفكير يآخد إتجاهات كلها مقفولة ومبتوصلش لنتيجة ومعروف إن الإكتئاب بيأثر على التركيز والمذاكرة فهتبقى برضو بتضيع كل حاجة علشان أفكار ملهاش أى أساس من الصحة O.o !

    3- متسمعش لكلام اللى حواليك : الناس غيرك اللى بيفكروا فى الاكتئاب وبيحاولوا ينشروا الطاقة السلبية إبعد عنهم تماماً أو إسمع كلامهم من هنا وطلعه من الناحية التانية -_- والأهل اللى بيرددوا كتير كلمة اللى ذاكر ذاكر وإبقى قابلنى والكلام الفاضى دة حاولوا متركزوش معاهم الفترة دى خالص :D

    4- متفكرش كتير : المقصود هنا بالتفكير الكتير مش فى المذاكرة طبعاً :P مقصود بيه التفكير فى الأمور اللى مش بإيديك يعنى الإمتحانات هتيجى صعبة ؟ التنسيق هيكون عالى ؟ أنا كنت صح لما دخلت علمى ؟ كان قدامى فرصة أحول من دى ؟ يا ترى هعرف أدخل كلية كويسة من أدبى ؟ . . أفكار كتير جداً بتظهر قدامنا فى الأيام دى وبتقلب بتأملات وبتضيع وقت ومجهود وممكن لو زادت تقلب بتوتر وإكتئاب ، الصح إنك تهرب من الأفكار دى لأنها هتضيع وقتك على الفاضى . اعمل حاجه مفيدة وذاكر على طول .

    5- حلمك : لو فى حاجة ضرورى تكون قدامك فى وقت زى دة فهى  حلمك وهدفك اللى بتسعى ليه ويكون قدامك بطريقة صح يشجعك ويحمسك تواصل وتذاكر وتبذل أقصى مجهود عندك لكن إوعى تحطه قدامك بطريقة التفكير المريضة اللى بتضيع الوقت ( اللى اتكلمنا عنها فى نقطة متفكرش كتير ) خلى حلمك خط سيرك ;)

    6- إعمل اللى عليك : حاول فى الفترة دى تعمل كل اللى تقدر عليه  وتذاكر وتجمع الدنيا وتفصل عن أى مشاكل أو تعب وتركز بس فى مذاكرتك وتنظيم وقتك علشان لما النتيجة تظهر أياً كانت النتيجة فتبقى عارف إنها قدر ربنا وإنك مقصرتش بالعكس إنت عملت كل اللى تقدر عليه ( وأكيد طبعاً هتبقى كويسة وهتفرحوا كلكم ^_^ )

    7- سيبها على ربنا : القاعدة الذهبية فى الفترة دى واللى لو قدرت توصلها تأكد إن الشهرين الامتحانات دول هيعدوا على خير :D لازم بعد ما تعمل كل  الحاجات اللى فاتت دى تسيب كل حاجة على ربنا وتتأكد إنه مش هيضيع تعبك ولا مجهودك مهما حصل وتبدأ تطمن وتذاكر بتركيز وثقة فى الله ثم فى نفسك :)

    ذاكر صح يا صديقى / صديقتى وستصل إلى حلمك وهدفك إن شاء الله ولا تقلق .. حاول وحاول وسوف تصل بإذن الله لكل ما تريد .

    اقرأ أيضاً :

    ليست هناك تعليقات:

    إرسال تعليق

    مقالات مميزه

    موسوعة تبسيط العلوم